Euskal WordNet EuroWordNet-en markoan garatu da, euskal hitzak ingelesezko WordNet-era metodo erdiautomatikoz lotuz. Ingelesaren gehiegizko eragina saihesteko eta kalitate linguistikoa babesteko euskal synset-ak eskuz orraztu dira bi pasalditan: lehenengoan, kontzeptutik kontzepturako pasaldi batean, euskal hitzen eta synset-en arteko lotura egiaztatu da; bigarrenean, hitzetik hitzerako pasaldian, hitzei estekatutako hitz-adieren osotasuna bermatu da. Metodo honen bidez, azkartasuna eta kalitatea uztartu nahi dira.